មិនមែនជាអាចម៍ផ្កាយទេ! ឥណ្ឌូនេស៊ីបញ្ជាក់ថា ពន្លឺចម្លែកលើមេឃកាលពីថ្ងៃសៅរ៍ គឺជាកម្ទេចកម្ទីរ៉ុក្កែតចិន
កាលពីយប់ថ្ងៃសៅរ៍ ទី៤ ខែមេសា ឆ្នាំ២០២៦ កន្លងទៅនេះ ប្រជាជននៅក្នុងខេត្ត Lampung និង Banten នៃប្រទេសឥណ្ឌូនេស៊ី មានការភ្ញាក់ផ្អើល និងភ័យខ្លាចយ៉ាងខ្លាំង បន្ទាប់ពីបានឃើញវត្ថុមានពន្លឺចម្លែកហោះកាត់មេឃយ៉ាងលឿន ដែលមើលទៅហាក់ដូចជា "ភ្លៀងអាចម៍ផ្កាយ" ឬអ្នកខ្លះបារម្ភថាជាការវាយប្រហារដោយមីស៊ីល។
ទោះជាយ៉ាងណាក៏ដោយ នៅថ្ងៃអាទិត្យនេះ ទីភ្នាក់ងារស្រាវជ្រាវ និងច្នៃប្រឌិតជាតិរបស់ឥណ្ឌូនេស៊ី ដែលហៅកាត់ថា BRIN បានចេញមុខបកស្រាយ និងជម្រះមន្ទិលសង្ស័យនេះហើយ។
យោងតាមការបញ្ជាក់ពីលោកសាស្ត្រាចារ្យ Thomas Djamaluddin អ្នកជំនាញផ្នែកតារាសាស្ត្រនៃទីភ្នាក់ងារ BRIN បានឱ្យដឹងថា៖
វត្ថុនោះមិនមែនជាអាចម៍ផ្កាយតាមធម្មជាតិឡើយ ប៉ុន្តែវាគឺជា "កម្ទេចកម្ទីលំហអាកាស" (Space Debris) ដែលជាសំណល់នៃរ៉ុក្កែត Long March 3B (CZ-3B) របស់ប្រទេសចិន។
កម្ទេចកម្ទីរ៉ុក្កែតនេះ បានហោះចូលមកក្នុងស្រទាប់បរិយាកាសផែនដីវិញ (Re-entry) ក្នុងល្បឿនលឿនបំផុត។ នៅពេលវាប៉ះទង្គិចជាមួយខ្យល់ក្នុងស្រទាប់បរិយាកាសក្រាស់ កម្តៅដ៏ខ្លាំងបានធ្វើឱ្យវត្ថុនោះឆេះ និងបែកខ្ញែកជាបំណែកតូចៗ បង្កើតបានជាពន្លឺភ្លឺចិញ្ចាចដូចដែលយើងបានឃើញក្នុងវីដេអូ។
តាមការវិភាគគន្លងតារាវិថី បំណែកទាំងនេះបានហោះចេញពីទិសដៅប្រទេសឥណ្ឌា សំដៅទៅកាន់មហាសមុទ្រឥណ្ឌា នៅភាគខាងលិចកោះស៊ូម៉ាត្រា។
អាជ្ញាធរឥណ្ឌូនេស៊ីបានអំពាវនាវឱ្យសាធារណជនកុំមានការភ័យស្លន់ស្លោ ព្រោះបំណែកភាគច្រើនបានឆេះអស់នៅក្នុងបរិយាកាសមុនពេលធ្លាក់ដល់ដី ហើយបាតុភូតនេះក៏មិនបានបង្កគ្រោះថ្នាក់ដល់មនុស្សឡើយ៕
ប្រភព៖CNA
