ស្ថានភាពនៅលីបង់ខាងត្បូង៖ ក្រុម Hezbollah ប្រើដ្រូនវាយប្រហារ អុីស្រាអែល នៅក្នុងតំបន់ al-Qantara

ទន្ទឹមនឹងនេះ កងទ័ពអ៊ីស្រាអែលបានពង្រីកវិសាលភាពនៃប្រតិបត្តិការរបស់ខ្លួន ដោយចេញបញ្ជាឱ្យប្រជាជនជម្លៀសខ្លួនចេញពីតំបន់មួយចំនួនក្នុងស្រុក Tyre ដែលស្ថិតនៅក្រៅតំបន់ដែលអ៊ីស្រាអែលហៅថា "តំបន់ទ្រនាប់"។

យោងតាមវីដេអូដែលត្រូវបានចែកចាយដោយប្រព័ន្ធផ្សព្វផ្សាយរបស់ក្រុម Hezbollah កាលពីពេលថ្មីៗនេះ ដ្រូនអត្តឃាតប្រភេទ FPV ដែលបញ្ជាដោយប្រព័ន្ធកាមេរ៉ាផ្ទាល់ខ្លួន បានហោះសំដៅទៅបុកកម្ទេចរថយន្តយោធារបស់អ៊ីស្រាអែលយ៉ាងពេញទំហឹង។ ការវាយប្រហារនេះ ធ្វើឡើងចំពេលដែលក្រុម Hezbollah កំពុងបង្កើនយុទ្ធសាស្ត្រសង្គ្រាមដ្រូន ដើម្បីទប់ទល់នឹងការចូលលុកលុយតាមជើងគោករបស់កងទ័ពអ៊ីស្រាអែល (IDF) នៅក្នុងភូមិសាស្ត្រភាគខាងត្បូងលីបង់។

ស្របពេលជាមួយគ្នានេះ កងទ័ពអ៊ីស្រាអែលបានចេញសេចក្តីប្រកាសអាសន្ន ឱ្យប្រជាជននៅក្នុងក្រុង Tyre (ទីរ៉េ) និងតំបន់ជុំវិញ បោះបង់ទីលំនៅជាបន្ទាន់។ បញ្ជាជម្លៀសថ្មីនេះ រួមមានភូមិជាច្រើនដែលស្ថិតនៅហួសពី "តំបន់សុវត្ថិភាព" ដែលអ៊ីស្រាអែលធ្លាប់បានកំណត់ពីមុន។ អ៊ីស្រាអែលបានអះអាងថា ខ្លួនចាំបាច់ត្រូវតែប្រតិបត្តិការវាយប្រហារលើទីតាំងលាក់ខ្លួន និងឃ្លាំងអាវុធរបស់ក្រុម Hezbollah ដែលបង្កប់ក្នុងតំបន់សេវិលទាំងនោះ។

គិតត្រឹមថ្ងៃទី ២៩ ខែមេសា ឆ្នាំ ២០២៦ នេះ ការបាញ់បោះដាក់គ្នានៅតែបន្តកើតមាន បើទោះបីជាមានកិច្ចខិតខំប្រឹងប្រែងឈានទៅរកកិច្ចព្រមព្រៀងឈប់បាញ់ក៏ដោយ។ ក្រសួងសុខាភិបាលលីបង់បានរាយការណ៍ថា ការវាយប្រហារតាមអាកាសរបស់អ៊ីស្រាអែលក្នុងរយៈពេល ២៤ ម៉ោងចុងក្រោយ បានបណ្តាលឱ្យមានអ្នកស្លាប់ និងរបួសជាច្រើននាក់ រួមទាំងបុគ្គលិកសង្គ្រោះបន្ទាន់ផងដែរ។

សូមជម្រាបថា ការប្រើប្រាស់ដ្រូន FPV របស់ក្រុម Hezbollah ត្រូវបានគេមើលឃើញថាជាការផ្លាស់ប្តូរយុទ្ធសាស្ត្រថ្មីមួយដែលបង្កការគំរាមកំហែងខ្លាំងដល់គ្រឿងចក្រសឹករបស់អ៊ីស្រាអែល។ ខណៈដែលការជម្លៀសប្រជាជនកាន់តែរីកធំទៅៗ ពិភពលោកកំពុងតាមដានយ៉ាងយកចិត្តទុកដាក់ ខ្លាចក្រែងជម្លោះនេះផ្ទុះក្លាយជាសង្គ្រាមទ្រង់ទ្រាយធំពេញតំបន់មជ្ឈិមបូព៌ាទាំងមូល។

ប្រភព៖ Al Jazeera English